黃偉民之癸巳蛇年前因後果(3) ── 依個流年，奪你所愛
出年癸巳年，係蛇年，大家都知，因為巳係蛇，但蛇年，天干唔一定係癸干。
中國以天干地支紀時，每年每月每日每時，都有佢嘅天干地支。
甲午戰爭，咪甲午馬年囉，戊戌政變，咪戊戌狗年囉，辛亥革命，咪辛亥豬年囉。大家對十二地支嘅十二生肖，都瞭如指掌，但對十個天干，似乎就好陌生嘞。
十個天干，係甲乙丙丁戊己庚辛壬癸。
紫微斗數，就主要用依十個天干，嚟推斷吉凶。
出年癸巳年，癸破巨陰貪。破軍化祿，巨門化權，太陰化科，貪狼化忌。
化祿係財祿追求，化權係權力彰顯，化科係科名千里，化忌係煩惱障礙。
依門術數，想話俾我地聽，生命無完美，有祿有權有科之後，就一定有缺陷挫折嘅地方。依個，就係化忌。
這個新年，癸巳年，化忌嘅，係貪狼星。
貪狼，係紫微斗數中，第一桃花星，貪於情，貪於欲。
化咗忌，就變為奪愛。追求而無法滿足，演變為不斷追求。
奪愛，奪乜嘢愛？奪你所愛。
你愛乜嘢，就冇咗乜嘢，愈係冇咗，愈要追求，求之不得，輾轉反側。
依一年，破軍化祿，必然會照貪狼化忌，以祿挑忌，奪你所愛，但俾番另類補償。但係，偏偏你心不在此，除卻巫山不是雲。
你想優閒生活，偏偏工作繁忙，財源滾滾。外邊人人羨慕，只有你有苦自己知。
名利雙收，位高權重，偏偏家庭冰冷，夫妻無言。你一生追求原來不過是家庭幸福。
依個流年，癸干抬頭，人人都係貪狼化忌，奪你所愛。
Search